The Fruit of the Spirit (POKOMCHI, WESTERN: Bible NT)

POKOMCHI, WESTERN: Bible NT

Galatians (Galatas) 5:22-23

22 Je’ aj re’ ru’ ric’am cho i c’acharic chi chopo̱j kana̱ ru’um i mahc, raj la’ i c’acharic chopo̱j na̱ ru’um i Lok’ laj rUxlabal i Dios re’ take wili nc’uhtunic lok wi̱’: Re’ quic’axaric take kas kacha̱k’, re’ wih’ic pan sukquil c’uxlis, re’ wih’ic pan tuklic laj c’uxlis cu̱c’ take kich c’acharel. Je’ wo’, re’ Lok’ laj rUxlabal i Dios riyew kak’unil eh re’re’ riyew wo’ chak’lamil pan ka̱mna ch’i̱l riqueteljic quiwach take kas kacha̱k’, on riyew wo’ kacapew-bal chi rich’iquinjic kac’ux chiri̱j i Dios.

23 Ma’ xa re’ ta re’ je’ la’ wo’ riyew keh i ch’ublic wach c’uxlis pan ka̱mna, riyew wo’ kano’jbal chi ripitjic ki̱b ru̱c’ pa’ bih ma’ holohic ta nkac’ax nak wach ribanjic. Wi c’acharic aj na’n tak ru̱c’ take no’jbal re’re’, ma’xta chic jeno’ toco̱m c’uhbal eta nak ntak’anic chana̱ tak.

The Fruit of the Spirit (POKOMCHI, EASTERN: Bible)

POKOMCHI, EASTERN: Bible

Galatians (Galatas) 5:22-23

22 Eh re’ i ruwachuj i Santolaj Uxlab’al reh, re’ k’axaj iib’, re’ suq laj k’uxliis, re’ wihik pansuqkiil, re’ kuyuuj, re’ chaq’lamiil, re’ otob’il, korik wach k’uxliis,

23 re’ loch’ik, re’ ruq’ilariik qiib’ chi qib’il qiib’. Wila’ inqa a’n taqe re’, ma’ jino’q chik i k’uhb’aal neen ye’wik qeh panti’ k’axik.

The Armor of God (POKOMCHI, WESTERN: Bible NT)

POKOMCHI, WESTERN: Bible NT

Ephesians (Efesios) 6:10-18

10 Chi cohlsbal wach nik’orbal awu̱c’ tak nik’or aweh tak wili: Chi wilca̱t tak chic pan jenaj wach c’uxlis ru̱c’ i kAja̱w Jesus, ma̱cana̱’ tak risiq’uiric chi re’re’ nariyeb cho ricowil ac’ux tak ru̱c’ rinimal wach i rajawric

11 maj je’ ricab nok jeno’ sol xa tiklic wo’ ru̱c’ take chi’nchel ritz’a’bal ncamanic reh chi k’ak’anic je’ wo’ re’ i rito’bal i Dios, re’re’ camanok aweh tak chi peletenic ru̱c’ aj Yahm nok re’re’ xa tok’-tok’ cho chi ajot’oric tak.

12 Je’ re’ nik’or aweh tak ru’um chi re’ hoj ma’ re’ ta cu̱c’ kich ti’jolal c’ahchi’co̱j wi̱’ chi peletenic, cu̱c’ la’ take q’uih tuhm wach chi ma’ tob laj uxlabal wilque̱b pan te̱w c’uxic. Re’ take re’ wilic rehreh wach cajawric, nahsil take eh aj banol wo’ take reh balc’uxquilal. Chi’nchel take ma’ tob laj uxlabal wili, re’ take re’ quichopbic quina̱ take tinamit wilque̱b pa rik’ekomil i mahc.

13 Ru’um aj re’ je’ ricab nok jeno’ sol xa tiklic wo’ ru̱c’ take chi’nchel ritz’a’bal ncamanic reh chi k’ak’anic, je’ wo’ re’ hat-tak camanok aweh tak i rito’bal i Dios chi peletenic ru̱c’ aj Yahm chipam i k’i̱j nok re’ take ma’ tob laj uxlabal qui’oquic cho chi ajot’oric tak chi ribanaric i c’ahbilal eh chi nok ayeb tak chic pan ac’al i cajawric, xa tikilca̱t ok wo’ tak chi na̱tikim tak ju’ peletenic.

14 Reh aj chi xa tikilca̱t ok wo’ tak chi peletenic, curman chi coric ok wach i c’acharic cha’n tak maj re’re’ naribanic chi ena’n tak ricamaj i Dios chi coric chi ma’xta bih enk’etbic aweh tak je’ ricab jeno’ sol naribac’ ripa̱m chi coric, ma’xta bih enk’etbic reh chi peletenic. Je’ wo’, xa re’ wo’ i coric cha’n tak maj re’ ribanaric i wili, re’re’ nco’lonic aweh tak chi quiwach take ma’ tob laj uxlabal je’ ricab nok re’ tz’ih laj ch’ihch’ ncamanic chi co’lbal reh i riti’jolal ribakil i sol.

15 Je’ wo’ chic je’ ricab nok re’ sol wilic chic chiro̱k i xijab re’ nc’utunic wi̱’ chi tiklic chic chi ojic je’ wo’ re’ hat-tak xa tikilca̱t ok wo’ tak reh chi xa nic’ yu’ enak’or tak ribiral i holohic laj c’uhbal nye’bic sukquil c’uxlis pan ca̱mna take c’acharel.

16 Chiri̱j lok chi’nchel wili, nipahkaj aweh tak chi riman chic chach’ica̱’ ac’ux tak chiri̱j i kAja̱w Jesus reh chi na̱co’lem awi̱b tak chiwach take xa pa’ bih ricoj cho aj Yahm chi ajot’oric tak. Nok re’ hat-tak nach’ica̱’ ac’ux tak, je’ na wa’ric jenaj acamanbal tak je’ ricab i coten laj ch’ihch’ ricoj i sol chi co’lbal ri̱b chiwach take tz’ob-bal koplic cho rik’ak’il ncuturic cho chiri̱j chi cansbal reh.

17 Je’ wo’ chic, re’ rinabjic chi coric i co’lbal i̱b xiyew aweh tak i Jesus, re’re’ camanok aweh tak chi co’lbal awi̱b tak chi quiwach take ma’ tob laj uxlabal je’ ricab riban i sol chi ricoj i ripune̱t ch’ihch’ chi co’lbal rina̱. Je’ wo’, re’ riC’uhbal i Dios re’ riyew cho aweh tak i Lok’ laj rUxlabal camanok aweh tak chi peletenic je’ ricab nok re’ sol nc’u’lunic ru̱c’ k’as nah re̱ ch’ihch’.

18 Je’ wo’ ati̱j tak camanok aweh tak chi peletenic eh chi behsemaj acapew-bal tak ru’um i Lok’ laj Uxlabal, xa c’ahchi’ ok wo’ ca̱t-tak chi ti̱j chiwach i Dios eh chipam ati̱j tak re’re’ chapahkaj tak reh chi etirito’bej tak cho. Xa ic’lic ok wo’ ana̱ tak chi ti̱j chiwach i Dios k’uru’ eh ma̱cana̱’ wo’ tak ti̱j chiqui̱j take chi’nchel kich aj niminel.

The Armor of God (POKOMCHI, EASTERN: Bible)

POKOMCHI, EASTERN: Bible

Ephesians (Efesios) 6:10-18

10 Eh yu’naak hermano, i nuq’or taq aweh chi chasik’ taq rukowiil ak’ux ruuk’ i runimaal rajaawriik i QaJaaw Jesucristo.

11 Eh chakoj taq chi ko’lemb’al awiib’ chu’nchel i runimaal rajaawriik i Dios ruye’em taq aweh. Chi je’ re’, ma’ nee ta ruyoj taq ak’ux i aj Yahm nik’ nee raaj taq aajot’ariik,

12 ruum re’ hoj ma’ kuuk’ ta taqe quch ti’jolal k’ahchi’kooj chi peleto. Kuuk’ la’ taqe i k’ih b’uhr kiwach chi ma’ tob’laj uxlab’al wilkeeb’ cho panteew k’ahchi’kooj chi peleto. Re’ taqe re’ kitaaq’anik, wilik kajaawriik, eh kichopom naah i tinamit wach ak’al panq’equm kiye’em ruum i mahk.

13 Ruum aj re’, chu’nchel i rajaawriik i Dios ruye’em taq chaaweh kamanoq taq aweh chi ko’lb’al taq awiib’. Ruuk’ i re’, nee taq inakuy ransil i ti’ k’axik nik’ neenchalik taq cha naah, noq areqem taq chik rukowiil ak’ux.

14 Eh kow-oq taq ak’ux, xti cha yejaa’ taq awiib’ ruuk’ i korik laj ruq’oral i Dios. Eh re’ korik laj k’acharik taq neena a’n neenko’linik taq aweh chuwach i aj yahm.

15 Xa eliik-oq wo’ taq ayejaam awiib’, reh chi nee taq tiooj chuq’orariik i ak’ k’uhb’aal inye’wik qeh pansuqkiil k’uxliis.

16 Eh re’ ta naq i ruye’ariik taq ak’ux chi nimanik i nee taq inakoj chi jilow apulato ch’ihch’. Reh chi ma’ xta taq neetiruchej i je’ ch’aab’ qoplik ruq’aq’al i rukoj chi jot’b’al i aj yahm.

17 Re’ ko’lemb’al iib’, kamanoq taq aweh chi jilow ach’ihch’ puneet. Eh re’ ruq’oral i Dios i ruyeew taq aweh i Santolaj Uxlab’al, kamanoq taq aweh chi jilow taq ach’ihch’ k’ul q’as.

18 Eh maakanaa’ taq rub’aan aatiij, cha pahqaaj taq reh i Dios chib’ih taq inawaaj, ruuk’ i rajaawriik i Santolaj Uxlab’al. Xa eliik-oq na’lik taq aweh, reh chi ma’ nee tanyoj taq ak’ux. Eh cha a’n taq atiij chikiij chu’nchel santo laj aj nimaneel.

The Lord is my Shepherd (POKOMCHI, EASTERN: Bible)

POKOMCHI, EASTERN: Bible

Psalms (Salmos) 23

1 Re’ QaJaaw Dios incha’jinik weh, eh i ruyeew weh chu’nchel i ajwaal wach chi weh.

2 Eh i rub’an wuuk’ je’ rukab’ i rub’an i cha’jen tentzun: I ruk’am taqe i rutentzuun i wilik wii’ i ch’ahn inkik’ux i ruyeew taqe chi hi’lik. Eh i ruyeew kihaa’ panha’ ma’ kow ta rooq.

3 Eh re’ i QaJaaw Dios i ruyeew rukowiil i wánima. Kiruk’am chupaam i korik laj b’eeh ruuk’ i ruk’axb’al.

4 Atoob’ ta kinik’ik paruq’equmaal i ruyohb’alil i kimik, re’ hin ma’ xta nuyohb’isaj wii’ wiib’, ruum re’ hat wilkaat wuuk’ eh kina’koleej. I na a’n wuuk’, je’ rukab’ i rub’an i cha’jen tentzun ruuk’ taqe rukarote i ruko’leej taqe i rutentzuun.

5 Eh noq i nub’an nuwa’ nah méxa, re’ hat ticha’jinik weh chikiwach, ki-ixowanik nuwach. Re’ hat i naa chihkaaj i ink’ohnik laj iq’oom wach nunaah. Eh re’ wánima xamb’ulik chik chi rusuqkiil k’uxliis, je’ rukab’ noq imb’ulinik i kulk ye’aab’ ha’.

6 WaJaaw nuDios, xti korik noq chi juneliik i nuk’achariik naa aye’em weh aawotob’il. Naa aketelaam nuwach. Eh ma’ xata ajlamaj q’iij naa nuwihiik panapaat.

God’s Love (POKOMCHI, WESTERN: Bible NT)

POKOMCHI, WESTERN: Bible NT

John (Juan) 3:16

16 Je’ re’ k’uru’ ru’um chi re’ Dios k’e̱’ wo’ chic kojric’ax cho chi’nchel i hoj c’acharel, re’re’ xitak’a̱’ cho ayu’ wach ac’al i xa jenaj wo’ ti chi rAc’u̱n chiwach, reh chi xa hab wach i c’acharel erich’ica̱’ ric’ux chiri̱j ma’ eta chic nquimic chi junpech naric’acharic la’ chi junelic ar ru̱c’ i Dios.

The Beatitudes (POKOMCHI, WESTERN: Bible NT)

POKOMCHI, WESTERN: Bible NT

Matthew (Mateo) 5:3-12

3 Re’ hat-tak re’ xa jenaj ti nak’or tak je’ ricab nc’uhtunic ru̱c’ acapew-bal tak, sukbok ac’ux tak maj re’ Dios re’ nk’atbic cho k’oric cu pan taxa̱j, xiyew chic cho chana̱ tak i ricuse’sbal.

4 Je’ wo’ re’ cha’n i hat-tak re’ suk tok’ic tak ru’um ti’c’axic nac’ul tak maj re’ Dios nariyeb risukquil ac’ux tak nok je’ re’ wilca̱t tak wi̱’.

5 Je’ wo’, sukbok wo’ ac’ux hat-tak re’ ch’ublic ti wach ac’ux tak maj re’ Dios nariyeb aweh tak i k’oro̱j chi nariyeb je’ ricab nok jeno’ winak riyew cahnok riye’a̱b queh take ra̱’ ri’sil.

6 Re’ hat-tak re’ k’e̱’ nawotowej tak chi naribanaric i coric, je’ ricab rotowjic quiwa’ quiha̱’ nca’n take ma’ quiniq’uem ta chic wi’c ha’, sukbok ac’ux tak maj ru’um chi je’ re’ ano’jbal tak narimanlajic wach ru’um i Dios re’ nawotowej tak re’re’.

7 Sukbok wo’ ac’ux hat-tak re’ naquetelej tak quiwach awas acha̱k’ tak, maj re’ aj wo’ Dios nariquetelem wo’ cho awach hat-tak.

8 Je’ wo’, re’ hat-tak re’ risakbem chic wach awa̱mna tak i Dios sukbok wo’ ac’ux tak, maj re’ hat-tak nawilom tak wach i Dios nachic’uhtaj ri̱b aweh tak.

9 Je’ wo’ re’ cha’n i hat-tak re’ tipitbic tak reh chi ma’ noquic ta cho wolic, maj ru’um chi re’ rino’jbal kAja̱w Dios nac’am tak tz’eht reh je’ wili narik’ormojic chawi̱j tak cu’um take awich c’acharel: ‹Re’ take re’ til rac’u̱n rixk’u̱n take i Dios, nqui narik’ormojic chawi̱j tak.

10 Je’ re’ ajic ru’um nok chi re’ Dios re’ nk’atbic k’oric ar pan taxa̱j xip’ut chic i k’atoj k’oric chana̱ tak ayu’ wach ac’al, sukbok ac’ux tak wi ru’um reh rinimjic riC’uhbal enac’ul tak i ti’c’axic.

11 Nik’or chi je’ re’ maj wi ru’um reh nitahkaljic i hin enac’ul tak ti’c’axic, tz’ujuric on enk’ormojic chucuj k’oric chawi̱j tak, jenaj rinimal sukquil c’uxlis enye’eric aweh tak.

12 Je’ re’ nik’or ru’um chi eticojoric tak chiwach i Dios chi je’ quicab take cho raj k’orol C’uhbal najtir k’i̱j. Je’ ricab chi re’ take cho aj k’orol c’uhbal re’re’ xye’eric cho ju’jun quisi̱ ru’um reh ric’uluric i ti’c’axic, re’ hat-tak nariyeb wo’ aweh tak i Dios jenaj asi̱ tak k’e̱’ holonquilal ar pan taxa̱j. Sukbok aj ac’ux tak k’uru’ nachac’ul tak i ti’c’axic xa ru’um chi hat-tak waj tahkanel.

God’s Love (POKOMCHI, EASTERN: Bible)

POKOMCHI, EASTERN: Bible

John (Juan) 3:16

16 Re’ Dios ma’ k’isiin ta xuk’ax i tinamit wach ak’al. Ruum, xiruyeew chee hin chi kaj Ko’loom i hin Rak’uun jinaj chi wib’il wiib’ chuwach, reh chi chu’nchel i naakinimaniik weh, ma’ naa ta rusahchiik kiwach, naa la’ ruwihiik kik’achariik chi juneliik.

The Beatitudes (POKOMCHI, EASTERN: Bible)

POKOMCHI, EASTERN: Bible

Matthew (Mateo) 5:3-12

3 Atoob’ keh awach inkireq chi riij chi ko wilik i ajwaal wach chi keh ruuk’ i kinimaniik ruum re’ keh kiehtrik i runimaal i rajaawriik i Dios.

4 Atoob’ keh inkikoj rehtaal chi ntz’irik kiwach, ruum re’ Dios naa ruye’wiik rusuqkiil kik’ux.

5 Atoob’ keh i xa ch’ub’ik wach kik’ux, ruum re’ keh naakik’ulum chi kiye’aab’ i q’orooj cho rib’iral keh ruum i Dios.

6 Atoob’ keh i xankotwaaj chik rub’anariik iraaj i Dios, ruum re’ reh naa rutoob’iniik keh chub’anariik.

7 Atoob’ keh inkiketelaaj wach i kas kichaaq’, ruum re’ Dios naa ruketeliniik kiwach i keh.

8 Atoob’ keh i saq wach i kánima, ruum re’ keh naakilom wach i Dios.

9 Atoob’ keh inkichop kik’ux chusik’ariik i wihik pansuqkiil k’uxliis, ruum re’ keh naa kikahniik chi rak’uun rixq’uun i Dios taqe.

10 Atoob’ keh inkikuy i ti’ k’axik imb’aan keh ruum i rub’anariik iraaj i Dios, ruum re’ keh kiehtrik i runimaal i rajaawriik i Dios.

11 Atoob’ taq aweh i hat wila’ xakuy taq i b’ajarik, i ti’ k’axik neenkian taq aweh, noq neenkitz’aq wach i xa reh reh wach chi chukuj q’orik taq chawiij ruum i nunimjiik i hin.

12 Eh xti suuqb’oq taq ak’ux ruum naa taq ak’ulum jinaj runimaal kooch ar pan taxaaj. K’oloq taq panak’ux chi je’ wo’ re’ noq x-ixoowjik cho kiwach taqe jalal ruq’oral i Dios xi wihik cho pampeet, inki Jesús.

The Ten Commandments (POQOMCHI’: Pokomchi Bible)

POQOMCHI’: Pokomchi Bible

Exodus (Ex) 20:3-17

3 Ma’ naa ta ruwihiik taq jino’q atokoom dios chi nuwach i hin.

4 Ma’ naa ta taq atz’aqam jino’q aatiyoox, ni xata naa atz’aqam taq rujal wach i wilik pan taxaaj, ni xata re’ i wilik wach ak’al, eh ni xata re’ wilik pan palaw chi ri’sil aak’al.

5 Eh ma’ naa ta wo’ axuk’aam taq awiib’ chikiwach i xatz’aqoj tiyoox, eh ni xata naa taq aloq’em. Ruum xa re’ wo’ hin, hin taq aaDios, eh inwaaj chi xa re’ wo’ hin naa nulooq’jiik, awach ki-ixowanik nuwach i nuyeew taqe chi tojariik i kimahk i keh, je’ wo’ hoq i kiih kimaam.

6 Re’ taqe i kik’axwik weh, eh inkinimaj i nuk’uhb’aal i nuyeew i nuk’axb’al chikinaah i keh, je’ wo’ hoq i kiih kimaam.

7 Ma’ q’or taq lom i nub’ihnaal i hin, chi xama’ xta rub’ehel i hin taq aaWaJaaw aaDios. Ruum awach inq’orik i nub’ihnaal chi xama’ xta rub’ehel, korehtaal i nuyeew chi tojariik i ru mahk.

8 Eh mansahchik taq panak’ux i hi’limb’al q’iij, chupaam i q’iij re’ re’ naa taq kiin aloq’em i hin, hin taq aaDios.

9 Waqiib’ q’iij taq naa akamaniik, eh chupaam i waqiib’ q’iij re’ re’ naa taq a’nam chu’nchel akamaj.

10 Eh re’ ruwuuq q’iij hi’limb’al q’iij, loq’oomb’al weh i hin, hin taq aaWaJaaw aaDios. Ma’ xta jino’q i kamanik naa taq a’nam i hat chupaam i q’iij re’ re’, ni xata re’ taq aawak’uun, awixq’uun, ni xata re’ taq amoso winaq, ni xata re’ taq awajpooh ixoq, ni xata re’ taqe aachikoop, ni xata re’ taqe i tokoom tinamit wilkeeb’ taq panatinamiit.

11 Ruum re’ hin taq aaWaJaaw aaDios, waqiib’ q’iij xnuyejaa’ wii’ i taxaaj, i wach ak’al, i palaw, ruch’ihil taqe i wilkeeb’ chupaam taqe re’. Eh chupaam i ruwuuq q’iij xinhi’lik, ruum aj re’, re’ hin taq aaWaJaaw aaDios xnukuxisaj i ruwuuq q’iij, eh xnukanaa’ chi loq’laj q’iij.

12 Chak’ax taq atuut awajaaw reh chi nee najtb’ik rooq aak’achariik ayu’ wach ak’al, re’ i nuye’em aweh i hin, hin taq aaWaJaaw aaDios.

13 Ma’ naa ta taq akaansaniik.

14 Ma’ naa ta taq ach’uwa’risam wach aakaxáro.

15 Ma’ naa ta taq awelq’aniik.

16 Ma’ naa ta taq atz’aqam wach i k’utaaj chi riij aawas achaaq’.

17 Ma’ naa ta taq ak’axam wach i rupaat aawas achaaq’, ni xata re’ i rehk’een aawas achaaq’, ni xata re’ rumoso winaq, ni xata re’ i rajpooh ixoq, ni xata re’ rub’oyaax, ni xata re’ i rub’uuruux, ma’ jino’q i chib’ih reh taq aawas achaaq’ naa taq ak’axam wach.